冰活藍貝意粉

難得一見今天眼前的菜式 - 冰活藍貝意粉和廣告圖案一模一樣，還比圖片的藍貝多了一隻，哈，走運了!藍貝一隻一隻整齊的排列好，配上番茄作點綴，感覺清新。經過今早的精神角力，也算是一種安慰吧。嚐貝類食品最忌有沙兼腥味，食過第一口後，哇，覺得上天今天對我還不薄，給我一頓精緻的午膳。說實在，這個菜絕不比中檔西餐廳遜色，至少有樣有內涵，用一個快餐的價錢品嚐到，是個不錯的選擇

吊命精選 - 葡萄適

我絕對唔係一個耐熱嘅人，加上香港夏天愈來愈熱，所以我病發嘅頻率有驟升嘅趨勢。太熱的話我會手軟腳軟兼頭暈，好似俾人攞左個靈魂咁。之但係我又唔可以俾自己昏厥係條街到咁樣衰架嘛，所以係呢個時候我都會即刻去仲有一間係你左緊嘅7-11買支葡萄適。跟據葡萄適官方網頁話︰

葡萄適能量飲品的液體葡萄糖，無須分解便能被人體直接吸收，能迅速補充體力，是隨時為身體及腦部提供能量的飲品。實驗證明，葡萄適能量飲品能幫助提升集中能力及警覺性，滿足消費者身體及腦部能量需要。

雖然我唔知道呢個治療方法是否正確，但係我飲完無耐真係會令個人舒服一點，至少唔會訓係街等白車。夏天就到，我間唔中都會買定支葡萄適放係袋，以備不時之需。

SWEET SWEET ^^

好想介紹東海堂4月初出品的冷凍俾大家-寵物學園甜品系列。
事實上，我還未有嚐過它們的味道，哈哈!不過我確確實實買下來，為的是要慶祝一位小妹妹的生日，四件剛好讓小妹妹一家四口分享。我食甜品除左因為口痕，最重要都係要令自己開心D，個人好DOWN嘅時候，我都會不惜一切買D甜品俾自己食，肥死都係咁話。所以呢，甜品味道固然重要，但係賣相都佔好多分。初次邂逅呢批冷凍已經覺得佢地好得意，好想買來食。可惜我近來真係無咩QUOTA，唯有忍口，不過我真係忍唔到手。為求滿足我呢個購買慾，就搵左上面個原因俾自己嘞。食唔食到唔緊要，最緊要買得開心，見到收O個個好SURPRISED嘅笑容仲滿足。$15一個，抵玩呀!

後記︰去東海堂個網睇下有無成個寵物學園甜品系列嘅相俾大家欣賞同時，發現佢新出左花樣蛋糕系列慶祝母親節，賣相很吸引。不得不讚東海堂的產品研發!

http://www.mangocake.com/site/tc/newsdetail.asp?id=239

西裝

前陣子朋友說很羨慕我的工作，皆因自由度大，不用常常待在辦公室。說實在，我也覺得不錯，不過你睇我好，有苦自己知。就好似而家咁，天氣悶熱，仍然要著住西裝貫穿九龍新界，同擔泥上山無分別。

西裝無分四季，就算熱到你的底底全濕，也不難見到街上還有不少人整套西裝穿梭在行人路。唉，無疑西裝多少都讓人感受到一種專業、一種信心，在介述時也會較自信，令內容更有說服力。但整天套上，未免有點虐待自己罷。悶熱的天氣我絕對受不了，而且很容易暈眩，所以只會把外套隨身攜帶，待向客戶介紹產品時才會穿上。我好佩服那些西裝友而且如此的敬業樂熱。但係各位，夏日炎炎著西裝同著件羽絨出街無分別，請在敬業時都要理智一點，不要違背了身體那些不是味兒的感覺。

夾萬

自問記憶力極差，對數字零敏感度，今日要我打開久違了的夾萬，實在有點吃力。吃力不只限於那幾組數字，還要左轉右轉再左轉再右轉，完全唔明點解前人會用呢種方法做密碼，真想車佢打一巴，害我今日用了半小時一試再試!不幸遇上上司心情欠佳，我唯有苦笑過去，著他再示範一次。事後不斷練習，最後加上圖像記憶法，把密碼牢記。其實密碼呢樣野對我真係無咩作為，好似今次，我最終都係用紙筆寫下記著，係人打開我本NOTES都知道密碼係咩。不過╴sorry，我唔寫，個夾萬呢世都開唔到。

Hi, Mrs. Field

今天下午，公司安排了一個3個多小時的講座，幾位同事都作了事前準備，買了好幾種小食調劑一下，突然有回到大學上LECTURE的感覺，變得年輕。看到其中一位同事手上的Mrs. Field cookies，也忍不住要了一口。提起Mrs. Field，記得大學時有次趕著交短片，那一次是我3年裡最有心機炮製的作品，連續幾天在editing lab埋頭苦幹多個小時，心力交瘁之際，跑到Mrs. Field買了一件Chocolate Chip Muffin，配上一杯香濃的熱可可，簡直是人生一大快事!如果閣下喜歡較軟身的muffins，可以試試他們的產品，特別是blueberry口味，打開軟綿綿的蛋糕，你會看到muffin內流著豐富的藍莓醬，咬下去時都要小心翼翼，不然便長出一個狼狽相。那香口和新鮮的藍莓，讓你覺得物超所值!正因為mrs. field毫不吝嗇它的用料，正值減磅的男女就要注意一下，始終，當我品嚐過那可可套餐後，也不安了好一陣子......